बुबाआमा,पत्नी र छोराछोरीको साथमा घन्टौ लगाएर पशुपतिनाथको दर्शन गरे विवेक ओबरायले
प्रकाशित मिति । २९ मंसिर, २०७९ ।
काठमाडौं । सपरिवार नेपाल घुम्न आइपुगेका बलिउड अभिनेता विवेक ओबरायले आज बिहान पशुपतिनाथ दर्शन गरेका छन् । बुबाआमा, पत्नी र छोराछोरीसहित उनले पशुपतिमा पूजाअर्चना गरे । व्यवसायी पुनम यादवको निम्तोमा आउनुभएका अभिनेता ओबराय दश दिन नेपालमा रहनुहुने बताइएको छ ।
“पहिलोपटक नेपाल आएको हुँ, मेरो बुबाआमा धेरै पटक आइसक्नुभएको छ”, त्रिभुवन विमानस्थलमा सञ्चारकर्मीसँग कुरा गर्दै उहाँले भन्नुभयो । नेपाल बसाइँका क्रममा पशुपतिनाथ दर्शन गरिसकेका उनि लुम्बिनी, पोखरालगायत ठाउँ घुम्ने कार्यक्रम रहेको बताइएको छ ।
अभिनेता ओबरायले प्याराग्लाइडिङ, बन्जीजम्प, धौलागिरि हिमालको अवलोकनसँगै म्याग्दीको घोरेपानी क्षेत्र घुम्ने कार्यक्रम तय भएको छ । झण्डै एक घण्टा मन्दिरमा बिताएको ओबराय परिवारलाई हेर्न फ्यान झुम्मिएका थिए ।
विवेकका पिता सुरेश भारतका प्रसिद्ध टेलिभिजन पर्सनालिटी समेत हुन् । नेपालमा समेत बाबु र छोराको राम्रै फ्यान फलोइङ छ ।
पशुपतिमा पूजापछि बाहिरिंदा गर्दा उनीहरुले फ्यानसँग तस्वीर खिचाए । पशुपतिमा पूजाका लागि आउने धोको पहिल्यैदेखि भएको र अहिले आउँदा मन शान्त भएको कुरा विवेकले मिडियासँग बताए । पशुपतिपछि उनीहरु चन्द्रागिरि घुम्न जाने कार्यक्रम छ । आजै उनीहरु पोखरातर्फ प्रस्थान गर्नेछन् ।
पोखरामा साहसिक खेलसहित घुमघाम गरेर उनीहरु अन्नपूर्ण संरक्षण क्षेत्रमा पर्ने म्याग्दीको घोरेपानीस्थित पुनहिलमा पदयात्रामा निस्कनेछन् । त्यहाँबाट पोखरा फर्किएर भैरहवा हुँदै लुम्बिनी जाने कार्यक्रम छ ।
लुम्बिनीबाट काठमाडौं फर्किएर भारत जाने उनीहरुको योजना छ । विवेकका पिता सुरेश भारतका प्रसिद्ध टेलिभिजन पर्सनालिटी समेत हुन् ।
गण्डकी प्रदेशबाट वार्षिक २० करोडको जडीबुटी बिक्री
सर्वाधिक निर्यात हुनेमा मुसली, दालचिनी, बुधनी फूल, तेजपात, चिराइतो, कुटकी, निरमसी, चिराइतो
कास्की — गण्डकी प्रदेशमा उत्पादित जडीबुटी विदेश निर्यात हुँदै आएको छ । गण्डकी प्रदेशबाट विदेशमा निर्यात गर्ने सम्भावना रहेको वस्तु तथा उत्पादनको इन्भेन्ट्रीसम्बन्धी अध्ययन प्रतिवेदनका अनुसार यस प्रदेशबाट वार्षित औसत ५६.१७ मेट्रिक टन जडीबुटी विदेश निर्यात हुँदै आएको छ ।
प्रतिवेदनअनुसार यहाँ उत्पादित जडीबुटी आधिकारीक व्यापारका रूपमा निर्यात हुन्छ ।
उक्त परिमाणका आधारमा यस प्रदेशबाट हालको बजार मूल्यलाई आधार मान्दा प्रतिवर्ष २० करोड ६२ लाख रुपैयाँ बराबरको जडीबुटी निर्यात हुने प्रतिवेदनको तथ्यांकमा देखिन्छ । यसबाहेक पनि जडीबुटीको अनधिकृत व्यापार हुने गरेको सरोकारवाला बताउँछन् । तत्कालीन उद्योग, पर्यटन तथा वन, वातावरण मन्त्रालयको वार्षिक प्रगति विवरण (२०७७) का अनुसार आर्थिक वर्ष २०७६/७७ मा जडीबुटीमध्ये यार्चागुम्बु सबैभन्दा बढी १३ करोड ३९ लाख रुपैयाँको व्यापार भएको थियो ।
यस्तै, काकोली/वन लसुन २ करोड ३९ लाख र सतुवा १ करोड ६३ लाखको व्यापार भएको प्रतिवेदनमा छ । मुख्य ५ प्रजातिको कुल वार्षिक व्यापार १८ करोड ५३ लाख (९० प्रतिशतभन्दा बढी) भएको देखिन्छ । सबैभन्दा बढी परिमाणमा व्यापार भएको जडीबुटीहरूमा मुसली (७.२ टन), दालचिनी (५.९ टन), बुधनी फुल (४.७ टन), तेजपात (४.२ टन) र चिराइतो (३.५ टन) रहेका छन् । त्यस्तै कुटकी, निरमसी, चिराइतो र तेजपात विगत १० वर्षदेखि लगातार निर्यात (व्यापार) हुँदै आएको पर्यटन, उद्योग, वाणिज्य तथा आपूर्ति मन्त्रालयका सूचना अधिकारी विमल गौतमले जानकारी दिए ।
प्रतिवेदनका अनुसार कुल ६ वटा प्राथमिकीकरणका आधार (व्यापारमा रहेको वर्ष, व्यापार परिमाण, कुल व्यापारिक मूल्य, नेपाल सरकारको प्राथमिकीकरण, मूल्य अभिवृद्धिको सम्भावना र स्थानीय उपलब्धता) को आधारमा गण्डकी प्रदेशका प्राथमिकता प्राप्त १० जडीबुटीहरुमा तेजपात, चिराइतो, कुरिलो, कुटकी, सतुवा, सुगन्धवाल, मजिठो, जटामसी, विषजरा र यार्चागुम्बु रहेका छन् ।
यसैगरी, हस्तकलाका सामानलाई धातु तथा काष्ठकलाका र कपडाजन्य उत्पादनका रूपमा वर्गीकरण गर्न सकिने प्रतिवेदनले जनाएको छ ।
गण्डकी प्रदेशमा उत्पादन भई विदेशमा निर्यात हुने प्रमुख उत्पादनमा हस्तकलाका सामानहरुमा अल्लो तथा हेमबाट तयार भएका कपडाहरु, झोला तथा अन्य सामग्री बढी रहेको गौतमले जानकारी दिए । ‘कच्चा पदार्थका रूपमा सूतीको धागो आयात गरी राष्ट्रियलगायत विविध जातजातिका तयारी पोसाकको निर्यात पनि हुँदै आएको छ,’ उनले भने, ‘कच्चा धागोबाट बुनिएका झोला, रुमाल, टोपी तथा अन्य उत्पादनमा वार्षिक ५ करोडभन्दा बढीको यस्ता सामान निर्यात हुँदै आएको तथ्यांक छ ।’
उनले यसलाई अझै व्यवसायीकरण गर्न प्रदेश सरकारले पनि पहल गरेको बताए । ‘विधिगत रूपमा योजना नबनाइए पनि यसतर्फ मन्त्रालयको ध्यान गएको छ,’ उनले थपे, ‘कतिपय वस्तु हामी आफैं चिन्दैनौं । मूल्य पहिचान गर्न सक्दैनौं ।
यस विषयमा पनि विभिन्न अध्ययन त भएका छन् ।’ मन्त्रालयले जडीबुटीलगायतका सामानमा ठोस योजना सार्वजनिक गरेर कार्यान्वयन गर्नतर्फ ध्यान दिन आवश्यक रहेको जनाएको छ ।
तेक्वान्दो खेलाडी शेरबहादुरलाई ५लाख सहयोग
काठमाडौँ — तेक्वान्दोका पूर्वराष्ट्रिय खेलाडी शेरबहादुर सिंहलाई राष्ट्रिय खेलाडी कल्याणकारी कोष र राष्ट्रिय खेलकुद परिषद्बाट आर्थिक सहयोग प्रदान गरिएको छ ।
लामो समयदेखि कलेजो रोगबाट पीडित सिंहलाई कोषले २ लाख र परिषद्ले ३ लाख नगद प्रदान गरेको कोषका सचिव दीपक श्रेष्ठले जानकारी गराएका छन् । कोषका अध्यक्षसमेत रहेका राष्ट्रिय खेलकुद परिषद्का सदस्यसचिव टंकलाल घिसिङले नेपाल तेक्वान्दाका मुख्य प्रशिक्षक नविन श्रेष्ठलाई ५ लाखको चेक बिहीबार हस्तान्तरण गरे ।
कैलाली जिल्ला निवासी सिंहको दिल्लीस्थित नारायण सुपरस्पेसिएलिस्ट अस्पतालमा कलेजो प्रत्यारोपणका लागि उपचार भइरहेको छ । उनलाई क्रोनिक लिभर डिजिज सिरोसिस भएको चिकित्सकले जानकारी गराएका छन् ।
